Vill einhver gjöra svo vel að endurskrifa þessa frétt þannig að hún sé á skiljanlegu máli

Þetta er bara fyrir neðan allar hellur. Hvenær verður eiginlega hægt að lesa fréttir á mbl.is? Af hverju er viðtengingarháttur á ólíklegustu stöðum í þessari frétt? Og hver er meiningin með seinni hluta þessarar málsgreinar: Níu þúsund eðlisfræðingar hafa beðið spenntir eftir því að tilraunin hefjist en þeir munu taka þátt í henni?

Eða bara, hvað þýðir hún eiginlega? Eru þetta ekki eðlisfræðingarnir sem hafa unnið að því hörðum höndum að þessi tilraun verði gerð? Bíða þeir og taka svo þátt?

Ég gefst upp.

Öreindum skotið af stað

Athugasemdir

[Brynjar (IP-tala skráð) 10.9.2008 kl. 18:23]

Eðlisfræðingarnir hafa örugglega þurft að bíða eftir því að tólið verði sett saman áður en þeir geta hafist handa við tilraunir. Eitt er að vita lotukerfið, annað er að kunna verkfræði, þó einhverjir hærra settir hafa án efa haft auga með verkinu.

Auk þess er textinn fremur auðskiljanlegur, þó ekki sé um meistaraverk að ræða, fyrir utan einstaka hugtök eins og sterkeindir sem ég er ekki alveg viss hvað eru, en einföld google-leit gæti hjálpað.

[Erna Magnúsdóttir (IP-tala skráð) 10.9.2008 kl. 18:30]

Textin er alger hrákasmíði og viðtengingarháttur algerlega úr samhengi.  Jú, hann skilst kannski svona þegar maður fattar að maður þarf að setja sig í stellingar sjöttubekkjarkennara sem les yfir íslenskan stíl....  (ef stíl skyldi kalla).  Það er sorglegt hvað viðtengingarháttur er farinn að vefjast fyrir fólki nú til dags...

Og, Brynjar, til að leiðrétta þennan misskilning hjá þér, þá eru eðlisfræðingar ekkert endiega sérfræðingar í lotukefinu enda er hún uppflettirit.  Mér finnst hins vegar harla ólíklegt að það hafi ekki verið eðlisfræðingar sem smíðuðu hraðalinn,  svona græjur eru smíðaðar af fólkinu sem framkvæmir tilraunirnar.  Ég er algerlega sammála þessu hjá Elmari að síðasta setningin er óskiljanleg.  Þessir níu þúsund eðlisfræðingar sem bíða eru margir hverjir þáttakendur í verkefninu og munu fá send gögn til úrvinnslu úr hraðlinum og geta notað þau til þess að spyrja margs konar spurninga til dæmis varðandi uppruna alheimsins.  En það má ekki beint lesa úr þessari frétt að sú sé raunin.  

Ég skil ekki metnaðarleysið hjá mbl.is, það er alveg sorglegt!

[Brynjar (IP-tala skráð) 10.9.2008 kl. 19:42]

Ég veit að lotukerfið er uppflettirit, menntaskólanám segir manni það. Það sem ég átti við er að ég bjóst við að ákveðin verk við gerð vélarinnar, t.d. lagning ganganna og önnur tímafrek verk sem snúa ekki beint að mælitækjunum hlyti að hafa lent á verkfræðingum. Minntist á þetta aðallega útaf: "Eru þetta ekki eðlisfræðingarnir sem hafa unnið að því hörðum höndum að þessi tilraun verði gerð?". Hinsvegar er ég enginn sérfræðingur í þessu verkefni, er bara að segja það sem maður hélt.

Svo er tilgangur viðtengingarháttarins í textanum vissulega ruglandi, þó ég sagði að hann væri auðskiljanlegur. Hefði verið einfaldara fyrir höfundinn að segja einfaldlega: "Nokkrir hraðlar koma þar við sögu, fyrst línuhraðall, sem skýtur eindunum í lítinn hringhraðal...".